நீங்கள் தேடியது "பயணிகள் அவதி"

நெல்லை:

குமரி மாவட்டத்தில் பந்த் காரணமாக அங்கு பஸ்கள் ஓடவில்லை. கடைகள் அடைக்கப்பட்டுள்ளன. நெல்லையில் இருந்து ஏராளமான பஸ்கள் நாகர்கோவில், கன்னியாகுமரி, மார்த்தாண்டம் பகுதிகளுக்கு பஸ்கள் இயக்கப்பட்டு வருகின்றன. இதில் தினமும் ஏராளமான பயணிகள் பயணம் செய்கிறார்கள். நாகர்கோவில் பகுதியில் இருந்து நெல்லை, மதுரை ஆகிய பகுதிகளில் அரசு மற்றும் தனியார் துறைகளில் வேலை செய்வோரும், கல்லூரி மாணவ-மாணவியரும் இந்த பஸ்களை பயன்படுத்தியே வருவது வழக்கம்.

இதேபோல் நெல்லையில் இருந்து நாகர்கோவில் உள்ளிட்ட குமரி மாவட்டத்தில் பல பகுதிகளில் வேலை செய்வோர், கல்லூரிகளில் படிக்கும் மாணவ- மாணவிகளும் இந்த பஸ்களை நம்பியே உள்ளனர். பந்த் காரணமாக நெல்லையில் இருந்து குமரி மாவட்டத்துக்கு பஸ்கள் இயக்கப்படவில்லை. இதனால் பஸ் நிலையத்தில் பயணிகள் கூட்டம் அலை மோதியது. ஊருக்கு திரும்ப முடியாமல் பயணிகள் தவித்தனர்.

அரசு, தனியார் துறைகளில் பணிபுரிவோர் பஸ் ஓடாததால் திரும்பி சென்றனர். மேலும் பலர் ரெயில் நிலையம் சென்று ரெயிலில் பயணம் செய்தார்கள். இதனால் ரெயில் நிலையத்தில் வழக்கத்தை விட கூட்டம் அதிகமாக காணப்பட்டது. நெல்லை பஸ் நிலையத்தில் பயணிகள் சிலர் காத்திருக்கும் நிலை ஏற்பட்டது.

நெல்லை பஸ் நிலையத்தில் நகர்கோவில் பஸ்கள் செல்லும் பிளாட்பார்மில் எப்போது கூட்டம் அதிகமாக காணப்படும். பஸ்கள் ஓடாததால் பிளாட் பார்ம் வெறிச்சோடி காணப்பட்டது. எனினும் பயணிகள் தவித்தபடி நின்றனர். சில பஸ்கள் வள்ளியூர், பணகுடி, காவல்கிணறு விலக்குவரை இயக்கப்பட்டன. இந்த பஸ்களில் கூட்டம் அதிகமாக காணப்பட்டது.

இதேபோல் குமரி மாவட்டத்தில் இருந்து வள்ளியூர், பணகுடி, வடக்கன்குளம், ராதாபுரம், திருச்செந்தூர், தூத்துக்குடிக்கும் இன்று பஸ்கள் இயக்கப்படாததால் பயணிகள் பாதிக்கப்பட்டனர். மேலும் டவுண் பஸ்கள் ஓடாததால் நெல்லை-குமரி மாவட்ட எல்லைப்பகுதியில் உள்ள கிராம மக்கள் கடும் அவதிக்குள்ளானார்கள். #tamilnews

ஆலந்தூர்:

சென்னைக்கு டெல்லி, மும்பை, கோவா, அந்தமான் உள்ளிட்ட நகரங்களில் இருந்து காலையில் 10-க்கும் மேற்பட்ட விமானங்கள் வந்தன.

அதில் வந்த பயணிகளில் சிலர் ‘ஓலா’ கால்டாக்சியை செயலி மூலம் புக் செய்தனர்.

விமானத்தை விட்டு இறங்கி வருவதற்குள் புக் செய்து வருகைப்பதிவு 2-வது நுழைவு வாசலில் உள்ள அதன் கவுண்டர் அருகில் காத்து நின்றனர்.

காருக்காக நீண்ட நேரமாக காத்திருந்தனர். ஆனால் ஒரு மணி நேரத்துக்கு மேலாக ‘ஓலா’ கார் வராததால் 120 பயணிகள் வீடு திரும்ப முடியாமல் தவித்தனர்.

அவர்கள் அந்த நிறுவன கவுண்டரில் சென்று கேட்டனர். ஒரே நேரத்தில் அதிக பேர் புக் செய்ததால் கார் வருவதில் தாமதம் ஏற்பட்டுள்ளது என்றனர்.

விமானப் பயணிகள் தங்களது பயணத்தை திட்டமிட்டு செய்வதால் காருக்காக புக் செய்து நீண்ட நேரமாக கார் வராததால் குறித்த நேரத்திற்குள் வீடு திரும்ப முடியாமல் அவதிப்பட்டனர்.

பின்னர் ஒவ்வொரு காராக வரத்தொடங்கியதும் அவர்கள் பயணத்தை தொடர்ந்தனர். #ChennaiAirport

கே.கே.நகர்:

திருச்சியில் இருந்து ஷார்ஜாவிற்கு ஏர் இந்தியா எக்ஸ்பிரஸ் விமானம் இயக்கப்பட்டு வருகிறது. இந்த விமானம் தினமும் அதிகாலை 2-30மணிக்கு வந்து மீண்டும் 3.20 மணிக்கு சார்ஜா புறப்பட்டு செல்லும்.

இதையடுத்து வழக்கம் போல் இன்று அதிகாலை 2-30மணிக்கு திருச்சி விமான நிலையத்திற்கு சார்ஜா விமானம் வந்தது. அதில் பயணம் செய்ய இருந்த 103 பயணிகள், சோதனைக்கு பிறகு விமானத்தில் ஏறுவதற்கு தயாராக இருந்தனர். அப்போது விமானிகள், விமானத்தை இயக்கி பார்த்த போது தொழில்நுட்ப கோளாறு ஏற்பட்டு இருந்தது கண்டு பிடிக்கப்பட்டது.

இதையடுத்து அதனை சரிசெய்யும் பணியில் தொழில்நுட்ப குழுவினர் ஈடுபட்டனர். ஆனால் முடியவில்லை. இதையடுத்து பயணம் செய்ய இருந்த 103 பேரும், திருச்சியில் உள்ள தனியார் ஓட்டலில் தங்க வைக்கப்பட்டனர். சரியான நேரத்தில் செல்ல முடியாததால் பயணிகள் தவிப்புக்கு உள்ளாகினர். இன்று மாலை 5மணிக்கு விமானம் சார்ஜா புறப்பட்டு செல்லும் என ஏர் இந்தியா நிறுவனம் சார்பில் அறிவிக்கப்பட்டுள்ளது.

கடந்த சில நாட்களுக்கு முன்பு திருச்சி விமான நிலைய சுற்றுச்சுவரில் ஏர் இந்தியா விமானம் மோதி பறந்து சென்றது. அதில் சென்ற பயணிகள் அதிர்ஷ்டவசமாக உயிர் தப்பினர். அதன்பிறகு திருச்சி விமான நிலையத்தில் இருந்து துபாய், சார்ஜா உள்ளிட்ட நாடுகளுக்கு இயக்கப்படும் விமானங்களில் தொழில் நுட்ப கோளாறு ஏற்பட்டு ரத்து செய்யப்பட்டு வந்தது. இந்தநிலையில் இன்று சார்ஜா விமானத்தில் தொழில்நுட்ப கோளாறு ஏற்பட்டுள்ளது பரபரப்பை ஏற்படுத்தியுள்ளது.  #AirIndia  #TrichyAirport

குளித்தலை:

கரூர் ரெயில் நிலையத்திலிருந்து குளித்தலை வழியாக திருச்சி வரை தினந்தோறும் காலை பயணிகள் ரெயில் சென்று வருகிறது. இந்த ரெயிலில் குளித்தலை ரெயில் நிலையத்திலிருந்து குளித்தலை மற்றும் சுற்றுப்பகுதியில் இருந்து அரசு மற்றும் தனியார் கல்லூரி மாணவ- மாணவிகள், வேலைக்கு செல்வோர் என ஏராளமானோர் தினசரி பயணம் செய்து வருகின்றனர். இதில் கல்லூரி மாணவ- மாணவிகள் 3 மாதங்களுக்கு ரெயில் பாஸ் எடுத்துக்கொண்டும், வேலைக்கு செல்வோர் ஒரு மாதத்திற்கு பாஸ் எடுத்துக்கொண்டும் பயணம் செய்துவருகின்றனர்.

பஸ் கட்டண உயர்வை அடுத்து பஸ்சில் கூடுதல் கட்டணம் கொடுத்து செல்ல இயலாத பலர் திருச்சிக்கு செல்வதற்கு இந்த ரெயிலை பயன்படுத்தி வருகின்றனர். அனைத்து தரப்பினருக்கும் பயனுள்ள வகையில் இது உள்ளது. இந்த ரெயில் கரூர் ரெயில் நிலையத்திலிருந்து புறப்பட்டு குளித்தலை ரெயில் நிலையத்திற்கு காலை 7.49 மணிக்கு வந்து 7.50 மணிக்கு புறப்பட்டு செல்லும். பல நாட்கள் காலை 8 மணிக்கு கூட இந்த ரெயில் குளித்தலைக்கு வருவதுண்டு.

இந்த நிலையில் கடந்த செப்டம்பர் மாதம் தொடக்கம் முதலே இந்த ரெயில் குறித்த நேரத்தில் குளித்தலை ரெயில் நிலையத்திற்கு வராமல் அதிக காலதாமதமாக வருவதாக இதில் பயணம் செய்வோர் தெரிவிக்கின்றனர். காலதாமதமாக ரெயில் வருவதால் குறித்த நேரத்தில் கல்லூரிக்கு செல்ல முடியாமல் மாணவ- மாணவிகள் பெரிதும் பாதிக்கப்பட்டு வருகின்றனர்.

இதுபோல் அரசு மற்றும் தனியார் நிறுவனங்களுக்கு வேலைக்கு செல்வோர் குறித்த நேரத்தில் பணிக்கு செல்லமுடியாமல் அவதியடைந்து வருகின்றனராம். அதிக கட்டணம் செலுத்தி பஸ்சில் பயணம் செய்யமுடியாத காரணத்தினால் தான் ரெயில் பாஸ் எடுத்து மாணவ- மாணவிகள், வேலைக்கு செல்வோர் ரெயிலில் சென்று வருகின்றனர். இச்சூழ்நிலையில் இந்த ரெயில் மிகவும் காலதாமதமாக வருவதால் அதிக கட்டணம் கொடுத்து பஸ்சில் பயணம் செய்யவேண்டிய இக்கட்டான சூழ்நிலை அனைவருக்கும் ஏற்படக்கூடும். ஆகவே கல்லூரி மாணவ- மாணவிகள் வேலைக்கு செல்வோர் என அனைத்து தரப்பினரின் நலனை கருத்தில் கொண்டு இந்த பயணிகள் ரெயிலை குறித்த நேரத்தில் இயக்க ரெயில்வே நிர்வாகம் நடவடிக்கை எடுக்கவேண்டும் என்பதே ரெயில் பயணிகளின் வலியுறுத்தலாக உள்ளது. 

புதுச்சேரி:

புதுவை அரசின் சாலை போக்குவரத்து கழகத்தின் சார்பில் உள்ளூர் மற்றும் வெளியூர்களுக்கு 137 பஸ்கள் இயக்கப்படுகிறது.

பெங்களூர், சென்னை, திருப்பதி, நாகர்கோவில், மாகி, கடலூர், விழுப்பும் உள்ளிட்ட பகுதிகளுக்கு பஸ்கள் இயக்கப்படுகிறது. அதோடு புதுவையின் நகர பகுதியிலும், சுற்றுப்புற கிராமங்களுக்கும் பஸ் மற்றும் மினி பஸ்களும் இயக்கப்படுகிறது.

சாலை போக்குவரத்து கழகத்தில் நிரந்தர ஊழியர்கள் 450 பேரும், ஒப்பந்த ஊழியர்கள் 250 பேரும் பணியாற்றி வருகின்றனர். இவர்களுக்கு கடந்த 2 மாதமாக சம்பளம் வழங்கப்படவில்லை.

சம்பளம் வழங்க கோரி போக்குவரத்து ஊழியர்கள் துறை அதிகாரிகளிடம் பல முறை கோரிக்கை விடுத்தனர். ஆனால், எந்த நடவடிக்கையும் எடுக்கப்படவில்லை.

இதனையடுத்து அனைத்து தொழிற்சங்கத்தினரும், நேற்று மாலை துறை அதிகாரிகளுடன் பேச்சு வார்த்தை நடத்த திட்டமிட்டிருந்தனர். இதற்காக ஊழியர்கள் சங்க நிர்வாகிகள் தலைமை அலுவலகத்திற்கு வந்தனர்.

ஆனால், நீண்ட நேரம் காத்திருந்தும் அதிகாரிகள் யாரும் வரவில்லை. இதனால் ஆத்திரமடைந்த அனைத்து தொழிற்சங்கத்தினர் திடீர் வேலை நிறுத்த அறிவிப்பு செய்தனர்.

இதனையடுத்து மாலை 6 மணிக்கு மேல் அரசு பஸ்கள் இயக்கப்படவில்லை. நகரம், கிராம பகுதிகளுக்கு செல்லும் பஸ்கள் மட்டுமல்லாது வெளியூர் செல்லும் பஸ்களும் இயக்கப்படவில்லை. இதனால், பெங்களூர், சென்னை, திருப்பதி, நாகர்கோவில், மாகி உள்ளிட்ட பகுதிகளுக்கு முன்பதிவு செய்த பயணிகளும் அவதியடைந்தனர்.

பேச்சுவார்த்தை நடத்தி சம்பளம் பாக்கி தொடர்பாக உறுதி அளிக்கும் வரை வேலைநிறுத்த போராட்டத்தை தொடர்வதாகவும் தொழிற் சங்கத்தினர் அறிவித்தனர். இதனால், இன்று (புதன் கிழமை) 2-வது நாளாக வேலை நிறுத்த போராட்டம் தொடர்கிறது.

அரசு பஸ் ஊழியர்களின் வேலை நிறுத்த போராட்டத்தால் பயணிகள் கடும் அவதிக்குள்ளாகி உள்ளனர்.  #BusStrike

சென்னை:

சென்னை மாநகர போக்குவரத்து நெருக்கடியை குறைப்பதற்காகவும் விரைவு பயணத்துக்காகவும் மெட்ரோ ரெயில் திட்டம் உருவாக்கப்பட்டது.

கோயம்பேடு- ஆலந்தூர், சின்னமலை- விமான நிலையம் வரை உயர் மட்டப் பாதையிலும், திருமங்கலம்- சென்ட்ரல், சைதாப்பேட்டை- டி.எம்.எஸ். வரை சுரங்கப்பாதையிலும் மெட்ரோ ரெயில் சேவை நடந்து வருகிறது. மேலும் சென்னை மாநகரம் முழுவதும் மெட்ரோ ரெயில் சேவையை விரிவுப்படுத்தும் பணிகளும் நடந்து வருகிறது.

தற்போது மெட்ரோ ரெயில் பாதையில் ஒரே வாரத்தில் 3 தடவை ‘சிக்னல்’ கோளாறு ஏற்பட்டுள்ளது. இதனால் 30 நிமிடங்கள் வரை பயணிகள் சேவை முடங்கியது.

கடந்த 8-ந்தேதி 30 நிமிடங்களும், 11-ந்தேதி 25 நிமிடங்களும் நேற்று 12-ந்தேதி 30 நிமிடங்களும் சிக்னல் கோளாறால் போக்குவரத்து சேவை பாதிக்கப்பட்டது. இதனால் மெட்ரோ ரெயில்கள் ஆங்காங்கே நடுவழியில் நின்றன. மெட்ரோ பயணிகள் பெரும் அவதிப்பட்டனர்.

இதுகுறித்து மெட்ரோ பயணி ஒருவர் கூறியதாவது:-

சென்னை மாநகரத்தில் விரைவு பயணத்துக்காக மெட்ரோ ரெயில் போக்குவரத்து சேவையில் அடிக்கடி சிக்னல் கோளாறு ஏற்பட்டு வருவதால் பயணிகள் அவதிப்பட்டு வருகிறார்கள். ஒரே வாரத்தில் 3 முறை சிக்னல் கோளாறு என்பது ஏற்புடையது அல்ல.

மெட்ரோ ரெயில்கள் ஆங்காங்கே நடு வழியில் சிக்னல் கோளாறு ஏற்பட்டு நிறுத்தப்படுவதால் பயணிகள் உரிய நேரத்தில் செல்ல முடியவில்லை. இதனால் மெட்ரோ ரெயில் மீது நம்பகத்தன்மை குறையும். பயணிகளுக்கு எந்தவித பாதிப்பும் ஏற்படாத வகையில் மெட்ரோ ரெயில் இயக்க நடவடிக்கை எடுக்க வேண்டும்.

இவ்வாறு அவர் கூறினார். #MetroTrain